Minsa'y Isang Gamu-Gamo

Muli na naman akong napabilib ni Ate Guy sa isa niyang klasikong obra maestra... ang Minsa'y Isang Gamu-Gamo.

Tinalakay sa pelikula kung paano sambahin at paghirapan noon ng mga Pilipino ang makarating sa bansang Amerika. Marami ang nangangarap ngunit iilan lamang ang nabigyan ng pagkakataon. At isa si Corazon (Nora Aunor) sa mga sinuwerte. Ngunit sa mismong araw ng kanyang pag-alis, namatay ang kanyang nakababatang kapatid dahil sa pagbaril ng isang sundalong Amerikano.

"My brother is not a pig. MY BROTHER IS NOT A PIG! Ang kapatid ko'y tao, hindi baboy damo. HINDI SIYA BABOY DAMO! Ang kapatid ko'y tao hindi baboy damo. Hindi baboy damo ang kapatid ko."

Saludo ako sa bumuo ng pelikulang ito. Walang kapantay ang galing ng mga artistang sumambit ng mga linyang may kurot sa puso. Eto yung tipo ng pelikulang ayaw mong kumurap o mag-CR man lang dahil lahat ng eksena ay kaabang-abang. Isa sa matatapang na eksena ang pagbaboy at pagpapahiya ni Luz Fernandez sa karakter ni Perla Bautista.

Nahihiwagaan ako kung bakit ang ganitong klaseng pelikula na may kinalaman sa ating kasaysayan ay wala na sa panahon ngayon. Hindi lang naman puro katatawanan at lab istori ang mahalaga kundi pati na rin ang nakaraan. Mabuti na lamang at may nalalabi pang kopya ang iilan sa mga ito at maari nating balik-balikan.