Essence

7:30 ng umaga eksaktong dalawampung taon na ang nakararaan nang gisingin ako ni mudra sa mahimbing na pagkakatulog. Ibinilin ko kasi sa kanya na gusto kong mapanood ang bonggang live telecast ng Miss Universe 1994 sa channel 2. Ako'y siyam na taong gulang at tutuntong pa lang sa ika-tatlong na baitang sa susunod na pasukan pero beauty pageant na ang hilig.

Nagpakilala ang mga contestants all over the world separated by their region and continent. Makikita sa left side ng screen ang score sa swimsuit, evening gown sa right at sa gitna ang interview during the preliminaries. Siyempre excited ako para kay Charlene Gonzales. Kahit na sinasabihan siyang mataba at monay face noon, she was still one of the best candidates at heavy favorites. Siyempre may homecourt advantage eh. Nanalo pa ng Best in National Costume. Dedma sa mga kumontra kasi maganda naman talaga 'yung pagkakagawa.

Naalala ko pa andaming binebentang picas ng Miss Universe sa labas ng Sto. Niño Parachial School sa Bago Bantay QC. Depende sa size ang presyo, dos 'yung maliit at limang piso 'yung malaki. Doon yata naubos ang baon ko. Buti na lang naka-school bus ako or else, lalakad ako pauwi sa amin. Bukod kay Charlene, paborito ko noon sina Miss Australia at Miss Uruguay na mukhang mathunders na. Pagkakatanda ko 27 years na siya nung sumali.

Going back sa pageant, pang-siyam na semifinalist si Miss Philippines. Ang lakas ng hiyawan ng mga Pinoy. We take pageant seriously komento ni ateng sa background. Taas ng score niya sa swimsuit. High tide o low tide? Todong naaliw ang judges pati na ang host na si Bob Goen sa kuda niya. Hindi man tight fitting ang gown niya, pasok pa rin siya sa top 6. Sumemplang kay Superwoman. Ligwak sa top 3. What is the essence of being a woman? Halos pareho ang sagot ni Sushmita Sen at Carolina Gomez. Kitang kita sa TV kung paano napasimagot si Minorka Mercado nang siya ang tinawag na 2nd runner-up. Genuine ang pagbati ng Colombiana nung si Indiana ang manalo.

Makaraan ng ilang araw, pumunta kami sa palengke ni mama para mamili ng gamit niya sa pananahi. Sa tapat ng binibilhan niya ay photo shop. Nakadisplay sa harap ng tindahan ang mga kuha sa coronation night. Lagi kong tinitingnan sa tuwing pumupunta kami. Ang tagal ding nakadisplay doon. Inabot ng ilang taon hanggang sa kumupas at mawala.