Angkat

Courtesy of Abante-Tonite

Aatakihin yata ako sa presyo ng bigas ngayon. Namalengke ako nung 'sang araw at kulang ang two hams ko sa limang kilo. Kung dati ay nasa 30's lang eh maputi at masarap na ang kanin sa hapag, ngayon kulang ang kwarenta pesos mo. May mga tag-60 mahigit pa. NAKAKALOKA! Gustuhin mo mang bumili ng NFA rice, 'di mo naman matiis ang amoy at lasa. Ginawa yatang alak. Binuro muna bago ibenta.

Itinuturong dahilan nito ang kakapusan ng supply sanhi ng El Niño. Kesyo daw hindi panahon ng anihan, kulang ang irigasyon at mano-mano pa rin ang pagsasaka. Napag-iwanan na tayo ng mga kapit-bansa natin. Kung tutuusin nga, bongga ang kaalaman natin dati at dito ang kanilang training ground. Ngayon kinakailangan pa nating mag-angkat mula sa kanilang ani. Kapos ba sa budget ang Department of Agriculture para mapaunlad ang kagamitan?

Sa ibang bansa, itinuturing na isa sa mayayaman ang mga magsasaka. Dito sa atin eh isa sila sa pinakamahirap. Nakikitanim sa lupa nang may lupa, nakikiporsiyento sa bentahan at umuutang pambili ng punla. Kapag minamalas, napepeste o binabagyo ang pananim at nauuwi sa todong pagkalugi.

No choice ang mga mamimili kundi pagkasyahin ang budget. Kung 'sing bilis sana ng pagtaas ng presyo ang pagtaas ng sahod baka kayanin pa pero hindi eh. Kaya ang ulam at kanin dati, pancit canton ang humalili. Madaling lutuin, malasa at abot-kaya. Buti't may iba't ibang flavor kasi nakakaumay. Kung sawa ka na, mag-noodles ka. May sabaw pang mahihigop.